क्यालिफोर्नियाले वेमोका चालकरहित गाडीलाई सबै फ्रिवेमा प्रतिबन्ध लगायो
निर्माण क्षेत्र र हाइवे पेट्रोल गाडीसँग जोडिएका घटना दोहोरिएपछि क्यालिफोर्नियाको मोटर सवारी नियामकले वेमोलाई राज्यका फ्रिवेमा चालकरहित गाडी चलाउन वा परीक्षण गर्न रोक लगाएको छ।
क्यालिफोर्नियाले वेमो (Waymo) का स्वचालित गाडीलाई राज्यका फ्रिवेमा चल्न प्रतिबन्ध लगाएको छ। हालका केही घटनापछि अधिकारीहरूले यी गाडी “तत्काल खतरा” बन्न सक्ने बताएको द गार्डियनले जनाएको छ।
गत हप्ताको बुधबार जारी गरिएको प्रतिबन्धअनुसार वेमोले क्यालिफोर्नियाका कुनै पनि फ्रिवेमा आफ्ना चालकरहित गाडी चलाउन वा परीक्षण गर्न पाउँदैन। राज्यको मोटर सवारी विभागका प्रवक्ता जोनाथन ग्रोभम्यानले विज्ञप्तिमार्फत यो जानकारी दिए।
विभागले दुई घटनालाई आधार बनाएको छ। नोभेम्बर ५ मा वेमोका तीनवटा गाडी सान फ्रान्सिस्कोको दक्षिणमा सञ्चालित निर्माण कार्यका कारण बन्द गरिएको क्षेत्रमा पसे। त्यसको भोलिपल्ट, नोभेम्बर ६ मा, सान फ्रान्सिस्कोको एउटा हाइवेमा हाइवे पेट्रोलका गाडीसँग सम्बन्धित अर्को घटना भयो। यस घटनाको भिडियो गत हप्ता सामाजिक सञ्जालमा व्यापक फैलियो। त्यसमा क्यालिफोर्निया हाइवे पेट्रोलका गाडीले यातायात रोकिरहेका बेला एउटा वेमो गाडीले तिनलाई छिचोलेर जान खोजेको देखिन्छ।
ग्रोभम्यानका अनुसार निर्माण कामदार, सवारीसाधन र उपकरण भएका सक्रिय निर्माण क्षेत्रमा वेमोका गाडी बारम्बार पसेका कारण विभागले चालकरहित फ्रिवे सञ्चालनलाई जनसुरक्षाका लागि खतरा ठहर्याएको हो। मे १८ मा पनि यस्तै घटना भएको उनले बताए।
अल्फाबेटको सहायक कम्पनी वेमोसँग अमेरिकामा सबैभन्दा ठूलो स्वचालित गाडीको बेडा छ। गार्डियनका अनुसार सान फ्रान्सिस्को, लस एन्जलस र फिनिक्स वरपरका फ्रिवे र अन्तरराज्यीय सडकमा यसका गाडी गत वर्षदेखि चल्न थालेका थिए।
वेमोका एक प्रवक्ताले क्यालिफोर्नियाको यूएस १०१ मा भएका हालका निर्माण क्षेत्रसम्बन्धी घटनामा कसैलाई चोट लागेन र टक्कर पनि भएन भने। कम्पनीले सुरक्षालाई प्राथमिकता दिने उनको भनाइ छ। आफ्नो कार्यसम्पादन मूल्याङ्कन गर्न अन्य बजारमा पनि फ्रिवे सञ्चालन अस्थायी रूपमा सीमित गरिएको र फ्रिवे सेवा फेरि सुरु गर्न क्यालिफोर्निया मोटर सवारी विभाग तथा अन्य राज्य अधिकारीसँग काम गरिरहेको उनले बताए।
कम्पनीका अनुसार सहरका सडकमा भने वेमोका गाडी सामान्य रूपमा चलिरहेका छन्।
प्रतिबन्ध लगाउने कारण बनेका कमजोरी सुधार्न प्रभावकारी कदम चालेको कुरा वेमोले विभागलाई प्रमाणित नगरेसम्म रोक जारी रहने ग्रोभम्यानले बताए।

प्रतिक्रिया (0)