जिप्सी रोज ब्लान्चार्डका साझेदार केन उर्करको मृत्युको कारण सार्वजनिक
लुइजियानाका कोरोनरका अनुसार ३४ वर्षीय केनान 'केन' उर्कर अक्टोबर १ मा दुर्घटनावश धेरै प्रकारका लागुऔषधको विषाक्तताले मरेका हुन्। शेरिफ कार्यालयको छुट्टै छानबिन जारी छ।
लुइजियानाको ल्याफोर्श पेरिशको कोरोनर कार्यालयले जिप्सी रोज ब्लान्चार्डका साझेदार केनान 'केन' उर्करको मृत्युको कारण सार्वजनिक गरेको छ। उनको मृत्यु गत महिना भएको थियो।
द गार्जियनले उद्धृत गरेको यूएसए टुडेका अनुसार कोरोनर कार्यालयले सोमबार ३४ वर्षीय उर्करको मृत्यु अक्टोबर १ मा दुर्घटनावश धेरै प्रकारका लागुऔषधको विषाक्तता (पोलिसब्स्टेन्स ड्रग टक्सिसिटी) बाट भएको निष्कर्ष निकालेको जनायो। कार्यालयले आफ्नो तर्फबाट यो मुद्दा पूरा भएको पनि बतायो।
तर ल्याफोर्श पेरिश शेरिफ कार्यालयले मृत्युको परिस्थितिबारे आफ्नो छानबिन अझै जारी रहेको जनायो। यो छानबिन कोरोनरको जाँचभन्दा अलग रहेको उसले स्पष्ट पार्यो। हाल थप जानकारी दिन नसकिने पनि कार्यालयले भन्यो।
शेरिफ कार्यालयका अनुसार आफ्नो ३४ औं जन्मदिनका दिन उर्कर घरमै मृत फेला परेका थिए। आफन्तले हालचाल बुझ्न अनुरोध गरेपछि प्रहरी पुगेको थियो। प्रहरी प्रतिवेदनमा उनको शरीर 'छुँदा चिसो' र 'सास नफेरेको' अवस्थामा रहेको उल्लेख छ। बैठक कोठाबाट उनी ओछ्यानमा उत्तानो परेर सुतेको देखिन्थ्यो। बाथरूममा खैरो धुलोजस्तो पदार्थको छेउमा सुई (सिरिन्ज) र चम्चा फेला परेको पनि अधिकारीहरूले जनाएका छन्।
मृत्युपछि पिपल पत्रिकासँग कुरा गर्दै ब्लान्चार्डले भनेकी थिइन्, 'यो जानाजानी हो कि होइन मलाई थाहा छैन… उनी पछिल्लो समय राम्रो मानसिक अवस्थामा थिएनन्।' आमाको हत्यामा भूमिका खेलेबापत जेल सजाय भोगेकी ब्लान्चार्ड सन् २०२३ मा रिहा भएकी थिइन्। उनी जेलमा रहँदा नै उर्करसँग सम्पर्कमा आएकी थिइन् र उनीहरूकी करिब दुई वर्षकी छोरी छिन्।
ब्लान्चार्डले यो क्षतिको गहिराइ व्यक्त गर्न शब्द नभएको बताइन्। यो अत्यन्त पीडादायी समयमा छोरी, परिवार र उर्करको शोकमा रहेका सबैका लागि गोपनीयता र सहानुभूतिको अनुरोध उनले गरिन्।
शेरिफ कार्यालयले छानबिनमा के-के समेटिएको छ वा कहिले सकिन्छ भन्ने कुरा खुलाएको छैन।
